Stáinnak lea árvaseamos boazu olles máilmmis. Son lea ulddaid liikku boazu, jos son ii livčče de ii livčče ii oktage eará boazu. Stáinnak válddahallá guohttumis lobihága, ja biddju butkái.
Ulda nieidda guoktá, Alit- ja Ruksesoarpmealli viggaba gáddjot iežaset lihkkobohcco, leat ollu bárttit ja issoras fearánat dáhpáhuvvet.

Stáinnak máinnas ráhkaduvvui vuosttáš geardde vávváteáhterin Sámi Mánáid TVii 1980-logu álggus. Marry Áilonieida Somby lea čállán giehtačállosa, mii šattai girjin 2016:s. Das leat sámi máinnas- ja mytologiija hámit, ja soames hámiid lea Mary ieš hutkan. Muitalusas lea duođalaš vuođđu. Industriijaservodaga ávkkástallan, rašes Sámis lea dađi bahát seamma stuora áitagiin dál go dalle go čájálmas čállojuvvui.
Mary lea dovddus dikta- ja mánáidgirječálli. Son lea Sirpmás bajáššaddan, ja bargá maid govvadáiddárin. Geahčči beassá suotnjat Mary universii jo Galleri Martinas, ovdal go lávke teáhtersálii. Doppe heaŋgájit ge govvadáiddára govat.

Mis lea lagaš ovttasbargu Beaivváš Sámi Nationála Teáhterin, sin bargi Olav Johan Eira komponere ođđa musihka dán čájálmassii. Dán čájálmasas lea musihkka guovddážis, min álbmoga iežamet musihkka. Oažžu daddjat ahte dát lea juoigančájálmas. Su musihkka lea vásihan veara.

Dán vuoru leat njeallje Sámi Mánáid Teáhter oahppi neaktimin, ja okta dain lea čálli áhkut, Sara Biggá Somby Waly. Son lea maŋemuš jagi neavttároahppin. Eará oahppit lávdde alde leat : Jåvnna Hilje Esekiel Fjellgren, Vilde Madelen Ballari ja Máret Eirin Wigelius. Min ođđa Gielddadirektøvra Jørgen Holdten Jørgensen maid oidno čájálmasas.

Sámi Mánáid Teáhter neaktá sámegillii, čájálmas dulkojuvvo dárogillii gieldda dulkkarusttegiid bokte.

Jos ii heive boahtit 26.beaivve, de lea rabas maŋemuš hárjehallan 25.03 dii 1700

Bures boahtin Čájálmassii!